ഇംഗ്ലീഷ് കഥകൾ

ഒരു ഇരുപതു വർഷങ്ങൾക്ക് മുൻപ്, റിലയൻസ് വെബ് വേൾഡിൽ ജോലി ചെയ്യുന്ന കാലം. ഫ്രാഞ്ചൈസി ഉടമയായ നസീബിനിന്റെ "ഗൾഫ് ഡ്രീംസ്" ന്റെ അതെ കടയിൽ തന്നെ ആയിരിന്നു വെബ്  വേൾഡും; കുറച്ചു കാലത്തിനു ശേഷം വേറെ ഓഫീസ് ആകുന്നതുവരെ. ഫ്രാഞ്ചൈസിയിൽ "കൊമേർഷ്യൽ എക്സിക്യൂട്ടീവ് " ആയി ഞാൻ അങ്ങനെ അരങ്ങു വാഴുന്ന കാലം. കൂടെ കസ്റ്റമർ കെയർ എക്സിക്യൂട്ടീവ് ആയി കൂട്ടുകാരനായ ഷാദുമുണ്ട്. 

ഒരു ദിവസം നാട്ടിലെ കില്ലാഡിയായ ഒരു ഇക്ക ഷോപ്പിലേക്ക് വന്നു. ഞങ്ങളൊക്കെ സ്നേഹത്തോടപ്പം ഒരല്പം ഭയത്തോടെകൂടി  കണ്ടിരുന്ന  ആളാണ് കക്ഷി. അക്കാലത്തൊക്കെ പല വീരഗാഥകളും നാട്ടിൽ പാട്ടായിരുന്നു. ആള് വന്ന ഉടനെ 

" നസീബുണ്ടോ ?  എന്ന് ചോദിച്ചു 

"ഇല്ല ഇക്കാ"  ഞാൻ ഭവ്യതയോടെ പറഞ്ഞു 

എപ്പോ വരുമെന്ന് അറിയാമോ ?? പുള്ളി വീണ്ടും 

എന്തായാലും വൈകിട്ടാവും .. എന്തെങ്കിലും പറയണമെങ്കിൽ ഞാൻ പറയാം .. ഞാൻ വീണ്ടും 

ഗൾഫ് മേഖലയായ ഞങ്ങളുടെ നാട്ടിൽ മിക്കവാറും പാസ്പോർട്ട്, ഫ്‌ളൈറ്റ് ടിക്കറ്റ് തുടങ്ങിയ ആവശ്യങ്ങൾക്കൊക്കെ ആളുകൾ സമീപിച്ചിരുന്നത് ഈ " ഗൾഫ് ഡ്രീംസ് " നെയാണ് 

അല്ലടാ അനിയാ എനിക്കൊരു "കാർട്ടൂൺ" വേണമായിരുന്നു നാളെയാണ് ഫ്‌ളൈറ്റ്.. കില്ലാഡി ഇക്ക . 

ഇക്കാ "കാട്ടൻ"  ഇവിടെ ഉണ്ടോന്നു ഞാൻ നോക്കട്ടെ .. ഇംഗ്ലീഷിലുള്ള എന്റെ പരിജ്ഞാനം ഞാൻ പ്രദർശിപ്പിച്ചു 

"എന്തൊരിടാ .... കാട്ടനെ ? " ഇക്ക ഒരല്പം ഉച്ചത്തിൽ ചിരിച്ചു കൊണ്ട് ചോദിച്ചു   നിന്നെയൊക്കെ കോളേജിൽ പഠിപ്പിക്കാൻ വിട്ടത് വെറുതെ ..... ഇക്ക ചിരി നിർത്തിയില്ല 

"ഇക്ക സത്യത്തിൽ " കാട്ടൻ(CARTON) എന്നാണ് പറയാനുള്ളത്.അല്ലാതെ കാർട്ടൂൺ (cartoon ) അതുവേറെ .. ടി വി യിൽ കാണുന്ന ടോം ആൻഡ് ജെറി .. നമ്മുടെ ആൾക്കാർ തെറ്റായിട്ട് പറയുന്നത്. ഞാൻ എന്റെ ഭാഗം ന്യായികരിച്ചു

 

നീ എന്നെ പഠിപ്പിക്കിണായെ ?? ഇത്രയും കാലം ഗൾഫിലും എല്ലായിടത്തും ഞാൻ ഇതു തന്നെ ഞാൻ പറഞ്ഞത് . സായിപ്പിന്റെ കമ്പനിയിൽ വരെ ജോലി ചെയ്തിട്ടിട്ടുണ്ട് പിന്നെയാണ്.. ഇക്കയുടെ സ്വരത്തിൽ ഒരല്പം ദേഷ്യം വന്നു തുടങ്ങിയോ എന്ന് സന്ദേഹിച്ചു 

പിന്നെ ഞാൻ തർക്കിക്കാൻ നിന്നില്ല ..ഓ ക്കെ ഞാൻ ഇവിടെ ഉണ്ടെന്നു നോക്കട്ടെ .. ഉണ്ടെങ്കിൽ വൈകിട്ട് റാത്തിക്കൽ  വരുമ്പോൾ  കൊണ്ട് വരാം . ഞാൻ പറഞ്ഞു 

"എന്ന ഓക്കേ ഡാ .. പിന്നെ നിങ്ങളൊക്കെ പത്തക്ഷരം പഠിച്ചവരാണ് ... എന്ന് കരുതി  തെറ്റായിട്ടൊന്നും ആൾക്കാരെടുത്ത്‌ പറഞ്ഞു കൊടുക്കരുത്". ഇറങ്ങാൻ നേരം ഇക്ക എന്നെ സ്നേഹത്തോടെ ഉപദേശിച്ചു 

ഞാൻ തല കുലുക്കി .....   ഞാൻ ചെയ്ത തെറ്റ് എന്താണെന്നു മനസിലാക്കി. ആൾക്കാരെ അറിഞ്ഞും നോക്കിയും വേണം കാര്യങ്ങൾ പറയാൻ ... 

...............................

കാൽ നൂറ്റാണ്ടു മുൻപ് ... സ്കൂൾ വിദ്യാഭാസത്തിന്റെ അവസാന കാലഘട്ടം . ഞാനും എന്റെ പ്രിയ സുഹൃത്തും ബസിൽ വരികയാണ്. ഞാൻ ക്ലാസ് കട്ട് ചെയ്തു സിനിമയും കണ്ടു അഞ്ചേ മുക്കാലിന്റെ സിമിയിൽ വീട്ടിലോട്ട് വരികയാണ്. വഴിക്കു വെച്ച് ഇംഗ്ലീഷ് മീഡിയം സ്കൂളിൽ പഠിക്കുന്ന എന്റെ പ്രിയ സുഹൃത്തും ബസിൽ കയറി. ഞങ്ങൾ അങ്ങനെ വഴിയിൽ കണ്ട പെണ്പിള്ളേരുടെയും കണ്ട സിനിമയുടെയും കഥ പറഞ്ഞു ബസിൽ ഇരിക്കുക്കുകയാണ്. ബസ് മേൽ വെട്ടൂർ എത്തി.  മറ്റു ബസുകൾ വരുമ്പോലെയല്ല അന്ന് സിമി ബസ് വരുന്നത്. വർക്കല പഴയെഞ്ച അയന്തി വിളഭാഗം ഒന്നാംപാലം അങ്ങനെ കറങ്ങിയാണ് വരുന്നത്. അപ്പോഴാണ് ഞാൻ ഒരു കടയുടെ ഫ്രണ്ടിൽ ഒട്ടിച്ചിരുന്ന  സിനിമാ പോസ്റ്റർ കണ്ടത് 

"അളിയാ മുരളിയുടെ  'ചകോരം'  കണ്ടായിരുന്നോ / ഞാൻ ചോദിച്ചു 

എന്തൊരിടാ ? ചകോരമോ ?? കൂട്ടുകാരൻ ബസിനു പുറത്തേക്കു നോക്കി 

ഹി ഹി  ... നീയൊക്കെ മലയാളം മീഡിയത്തിൽ പഠിക്കുന്നതും ഞാൻ ഇംഗ്ലീഷ് മീഡിയത്തിൽ പഠിക്കുന്നതുമൊക്കെ കണക്ക് തന്നെ "

എനിക്കൊന്നും മനസിലായില്ല . ഞാൻ ഒരുനിമിഷം പകച്ചു  എന്നട്ടവന്റെ മുഖത്തേക്ക് നോക്കി 

ഡാ അത് വായിക്കുന്നത് " ചകോരം" എന്നല്ല .. "ചകേരം"... എന്നാണ് മനസിലായാ 

കൂട്ടുകാരൻ അല്പം ഉച്ചത്തിൽ പറഞ്ഞു  

അടുത്തിരിക്കുന്നവർ കേൾക്കും ..  ഞാൻ പറഞ്ഞു 

അത്രയും പറഞ്ഞപ്പോൾ അവൻ വീണ്ടും തെറ്റിധരിച്ചു .. കേൾക്കട്ടിടാ..  മലയാളം മീഡിയത്തിൽ ആയിട്ടും മലയാളം നേരെ ചൊവ്വേ വായിക്കാൻ അറിയാത്തതു . 

അളിയാ ഞാൻ പറഞ്ഞതാണ് ശരി .. ഞാൻ പറഞ്ഞു 

ഓഹ് പിന്നെ ഇപ്പൊ കിടന്നു ഉരുളിടാ ....

ഒരല്പം വിക്കിന്റെ അസ്കിത ഉണ്ടായിരുന്നത് കൊണ്ട് തർക്കത്തിൽ ഞാൻ പണ്ടേ മികവ് പുലർത്തിയിരുന്നില്ല. 

പക്ഷെ, പറഞ്ഞാൽ മനസിലാകുന്ന കൂട്ടുകാരൻ ആയതുകൊണ്ടും അടുത്തിരിന്നവർ ഞാൻ പറഞ്ഞതാണ് ശരി എന്ന് പറഞ്ഞതുകൊണ്ടും അവൻ തന്റെ തെറ്റ് അംഗീകരിച്ചു 

ഈ വീഡിയോ കണ്ടപ്പോൾ  പെട്ടന്ന് മനസിൽ തെളിഞ്ഞു വന്ന രണ്ടോർമ്മകൾ .. 

ഇനിയും കുറച്ചേറെയുണ്ട് ഇതുപോലെ  toyata (തൂറ്റ ) എന്ന് വായിച്ചവരും ഊണ് റസ് 10 (Rs 10) , to let നു   ടോയ്‌ലെറ്റ് , വിജയിയുടെ "പ്രിയമാനവളെ" പ്രായമായവൾ  എന്നൊക്കെ വായിച്ച കഥകളൊക്കെ പിന്നെയും ബാക്കി ..